من كام سنه لما كنت اسمع اغنيه وطنيه كنت بدمع ويمكن ابكى بحرقه كمان لو قاعده لوحدى مش بس دموع حب وانتماء لاء دى كمان كانت دموع قهر ومراره وكانى حاسه انى غريبه وبلدى كمان عايشه فى غربه وهى مكانها واحاسيس كتير اوى اكيد معظمنا عاشها كفايه لما كنت ارجع كل مره وانا مخنوقه بالبكا وانا رايحه جايه على تقديم الوظائف وبما ان مبدئى مش عايزه حاجه من حد ومش دافعه رشوه انا عايزه حقى وبس اتاخرت كل السنين اللى فاتت دى لحد ما اشتنغلت وفين.. فى اااخر الدنيا


اثناء احداث الثوره كان احساس مختلف اوى حسيت ان كل المراره اللى جوايا دابت فجأه رغم ان لسه احوالى الشخصيه زى ما هى بس حسيت كان كل اللى فى الميدان ردوا لى حقى وكرامتى ، حتى لما قلوبنا كلنا اتقطعت واحنا بنشوف قدامنا على الشاشه اولادنا واخوتنا بينصابوا وبيقعوا وبينزفوا و...بيموتوا دول شهدا موجوعين اوى من فراقهم لكن فرحانين ليهم وبيهم وكلنا ثقه ان حقهم مش هيضيع وحتى لو بكيت كنت ببكى من الغدر ومن وجع الفراق


لكن المراره رجعت تانى واقوى من الاول وانا بشوف كل يوم حد بيخرب حته من امى مصر او بيمد ايده وياذى اخوه -ابن مصر -عشان يسرقه او يروعه سواء عامل ده لانه اصلا مجرم او حد دافع له وبيستغل انه برضه مجرم وطبعا النوعين موجودين

كل ده عشان فتح ملفات الفساد يقف.. عشان مصر تضيع كل ده عشان نقول الزمن اللى فات كان احسن

لاء انا مش هقول كده الزمن اللى فات عمره ما كان احسن


القهر بره مصر وجواها بمباركه حكومتنا عمره ما كان احسن

استغلال النفوذ والسلطه بكل الافتراء اللى كان موجود مش احسن

سياسه مصلحه القله المندسه بس وليذهب الشعب الى الجحيم مش احسن

والتفاصيل كلها تعرفوها زى واكتر


واللى اكثر مراره ان البعض لسه مصمم يقول ان الثوره المصريه صناعه اجنبيه ولاول مره فى التاريخ نلاقى نفسنا بننفى عن اسرائيلى تهمه التجسس ..ليه؟؟ لان يبدو مش هو المقصود لكن المقصود يتقال ان هو اللى كان بيحرض المصريين على الثوره واعمال العنف- هو فيه جاسوس اسرائيلى هيجى مصر وعلى تليفونه صورته بالزى العسكرى الاسرائلى ومعاه فى صوره تانيه العلم الاسرائيلى

لو صدقنا ده يبقى صدقنا اولا ان ولادنا واخواتنا اللى كانوا فى التحرير هما اللى حرقوا اقسام الشرطه وهما اللى ولعوا الكنايس وهما اللى هاجموا مبانى المحافظات وثانيا نصدق ان المصرى عمره ما يقدر ياخد خطوه بنفسه ولا يثور على الظلم لوحده لاء ده لاوم حد اجنبى يحرضه وكده يبقى مش ثائر ده يبقى مخرب وعميل


العميل والمخرب هو اللى جايب اسلحه من بره مصر وطبعا مش ناوى يصوبها الى لصدور المصريين

عفاهم الله جميعا

العميل هو اللى بيدفع اللى سرقه من دمنا عشان يضيع اللى فاضل من عمرنا واحلامنا

طبعا كلنا عارفين مين حتى لو بعض اسامى منعرفهاش

انا مش هدمع تانى انا وكل واحد مننا باذن الله هنبقى اقوى

ةبلدنا هتبقى احسن بس ايدنافى ايد بعض ةكل واحد يبدا فى مكانه

والله لو صدقنا النيه واتبعناها بحسن العمل ربنا مش هيكسفنا

يا رب انصر مصر والمصريين ورد كيد من يريدونها بشر الى صدروهم

يا رب لما ولادى وولاد اخواتى يكبروا يعيشوا فى مصر الحريه والعداله

يا رب اعيش يوم الف الدول العربيه ببطاقتى من غير تاشيره ولا حدود

احلامى كتير وكبيره لكن ربى كرمه كبييييييييييييييير

كل التحيه لكم ولمصر الحبيبه

Nice Topic ya mohamed